القرار الحاسم

CEO & CHAIRMAN

بسم الله الرحمن الرحيم و به نستعين و عليه نتوكل

القرار الحاسم

من غير مقدمات عشان الكلام هيطول يا احلي اعضاء او بمعني اوضح
يا احلي مشرفين
محدش يقدر ينكر المستوي المتدني اللي وصل اليه المنتدي في الفترة الاخيرة
و اشكر اخويا العزيز سيمبا "احمد يسري" انه فوّقني

باختصار
اول خطوة لعلاج المشكلة هي معرفة المشكلة

و عشان نعرف المشكلة يبقي لازم تتصور نفسك و انت بتفتح النت شكلك عامل ازاي
او بتفتحه ليه

الاجابة بعد ما دورت و شفت اراء ناس كتير
استنتجت ان انج فور فن بقي موقع قديم
اه و الله قديم
يعني مفيش جديد
يعني فقدنا السينس
يعني فقدنا الهدف
حد يقوللي ايه الهدف من المنتدي
اكيد الرد
؟؟؟؟؟؟؟؟؟؟؟

الشق الثاني من المشكلة و ده اعتقد انه سهل الحل
و هو عدم وجود اعضاء جدد
مفيش دم جديد يشارك
كل الناس اللي بيشاركوا هما حبايبنا و مشرفيننا القدام
لكن فين الناس الجديدة
مفيش للاسف

اما بقي الشق الثالث من المشكلة و ده في ايد كل عضو فيكم
و هو الكسسسسسسسسل

بمعني اصح
و انا ايه اللي يخليني اتعب في منتدي
و انا مالي يا جدع
دي مسئولية المدير
تمام
بس لو مفيش مدير؟؟؟؟
اه و الله لو مفيش مدير
يعني لو نو يوري
نو مشمش
نو ميلانو
نو فامبير

تفتكروا المنتدي يمشي
اه طبعا يمشي
الناس دي مهمتها لا تقارن بمهمة الاعضاء

انما لو فيه يوري
فيه مشمش
فيه ميلانو
فيه فامبير
بس مفيش اعضاء

يبقي قول عالمنتدي يا رحمن يا رحيم

المقصود من اللي فات اني اعرفكم ان المنتدي مش بتاع يوري
و لا بتاع حد
المنتدي بتاع كل واحد حب انه يحمل اللواء
لواء ايه يا عم هو احنا رايحين نحارب؟؟؟
لا
اصدي المنتدي بتاع كل واحد فكر انه يكون واحد مننا و كان عنده النية الصادقة
و الادارة ما هي الا صوت الاعضاء

ايه لازمة الكلام ده كله يا عم؟؟؟
قلتلك
اول خطوة في علاج المشكلة هو التعرف عالمشكلة
و المشكلة هي ببساطة
مفيش هدف
مفيش اعضاء جديدة
كسل
و احب اضيف مشكلتين صغيرين

و هما
"المشرفين المتربين"
المشرف المترب هو المشرف اللي غطاه التراب و كلته العته و بقي موظف حكومي لا يطور من نفسه و لا يحسن من اداؤه
و كل وظيفته انه يبص و يمشي
ده لو بص اساسا

المشكلة التانية الاضافية
هي مشكلة الجمود الاداري و الشلل العام في المناصب الادارية العليا
ايه الكلام الكبير ده
الكلام ده موجه لافراد بعينهم مقصرين في اداء مهامهم الادارية
من ضمنهم انا و حطيت نفسي معاهم

نبدأ بأه في الخطوات الاضافية

الخطوة الاولي

1-تحديد هدف عام للمنتدي و هو حل اي مشكلة بتواجه اي انسان علي سطح الكرة الارضية
مش المقصود بكده اننا نجيب واحد واحد ماشي في الشارع نقولله ايه مشاكلك الكلام ده احد انشطة المنتدي و اللي بتقوم بيه المشرفة النشيطة سمسمة
انما المقصود
اي قضية بيعيشها اي انسان
مثلا الفيس بوك
او تفاخر الشباب بانهم بيعرفوا بنات
او الحشيش
او لغة الانترنت العجيبة "الفرانكو اراب"
اغاني الراب
عبادة الشيطان في مصر المحروسة
غطيان البلاليع اللي بتتسرق
الدكاترة في هندسه بيعاملونا كده ليه
الخ الخ الخ...
و مش هننسي اسم المنتدي
مهندسين مهيسين
يعني رغم اننا هنحل مشكلة او حتي هنناقش احداث القضية
الا اننا هناقشها بدم خفيف باسلوب كوميدي يجذب القارئ و يحفزه انه يشارك
مش تكتبلي توبيك اربعة متر في اربعة متر و كله مصطلحات مش فاهم منها حاجة
و تطلب مني اني ارد عليك
انا اصلا هكسل اقري التوبيك

الاهداف الجانبية للمنتدي
محاولة تنشيط القسم الدراسي داخل المنتدي
و ده هيتم عن طريق
اول حاجة لازم نجيب ناس تشرف عالاقسام دي و تنزل مواضيع و اخبار من كل قسم اول باول و تتفرغ للحكاية دي و مينفعش مشرفين الاقسام الترفيهية يمسكوها
و الكلام ده هيكون من خلال

اول حاجة
كل مشرف جوه المنتدي هيبلغني بانه هيسيب قسمه الدراسي و يسلمه لعضو هو يعرفه من الكلية و يكون معرف العضو ده علي مهام اشرافه في المنتدي و ايه المطلوب منه بالضبط
يعني يسسلم الشعلة بمعني اصح

ثاني حاجة
اسلوب الدعاية اللفظية
يعني مثلا
تنزل حل شيت
و تبلغ زمايلك في القسم
ان حل الشيت موجود علي انج فور فن

القسم الفرعي التاني
هيكون قسم التحميلات
و اللي هو الاقسام اللي بتحتوي علي اي لينكات تحميل
زي البرامج و الاغاني و خلافه
مشرف القسم ده
هيتطلب منه التركيز التام او الموت الزؤام في الحصريات
يعني اول ما البوم المطرب الفلاني ينزل
المشرف العلاني يعمل البدع
يقف علي راسه
يتشقلبله في قزازتين بيره
بس المهم
انه يكون موجود هنا
عالاقل قبل ما يبقي موجود عند باقي المواقع
مش مشكلة موقع و لا اتنين سبقونا
و النقل مش عيب
لو هتقول انه منقول

لكن العيب انك تكسل تنقل

كده احنا نوعا ما حطينا ايدنا علي اهم نقطة

الشق التاني من المشكلة
حله هيكون
دعاية شفهية من المشرفين لاصحابهم
و النص التاني هيبقي عالادارة هنطبع ورق زي الاول مع استهداف شريحة دفعة اعدادي السنة دي
و طبعا المشرف اللي مش هيوافق علي توزيع الورق معانا
يعني هيتبلغ و مش هيحضر
للاسف و بكل حزم هو معندوش نية انه يكون معانا وقتها
و يبقي بيضيع و قتنا و وقته و بياخد فرصه غيره

الشق التالت من المشكلة
و هو الكسل
فحله هيكون هو نفسه حل الشق الاول من المكسكلة مع اضافة ان شهريا هيتم تقييم المشرفين
و تعيين مراقب علي المشرفين لتقييم نشاطهم
و لو نزل نشاطهم عن حد معين بدون بلاغ للادراة
بيتم اقصاؤهم فورا من مناصبهم
و ده لمصلحة الجميع
مش لمصلحتي و زي ما قلت
انا مجرد عضو
و لست مديرا
و حتي انا اقل من ان اكون عضو
و لكني اسعي للمصلحة العامة

اما بقي مشكلة المشرفين المتربين
فدي بقي حلها عندي انا
هتقوم الادارة بتقييم نشاط كل مشرف
و حظر بدون تحذير بعضهم
و توجيه ثلاثة درجات من التحذير للمتكاسلين منهم
و من لا يوجه له تحذير و لكن يكشف تقييم الادارة عن خطأ ما في اسلوبه
بيتم تدريبه بكل بساطة و تنبيهه للغلط اللي بيواجهه
اهم شئ
لاي مشرف مترب
و المشرف المترب عارف انه مترب
هل انت مستعد تبدأ معايا صفحة جديدة و تلتزم و تطبق المطلوب منك و ترجع زي الاول
او تحس بمسؤلية ناحية المنتدي شوية
لو اجابتك نعم
يبقي انت رجل و الرجال قليل
و تستاهل نيشان و تخضع لمدة اسبوع نشوف فيه ايه سيتسمك الجديد اللي انت هتحطه لنفسك
اما لو اجابتك لا
فللاسف و بكل حزن هنضطر نقولك الوداع كنت اخ عزيز و صديق لينا و مش معني انك اقصيت من الاشراف انك متشاركش
لا
ممكن تبقي عضو نشيط و تبقي احسن من المشرف كمان

لكن طاقم المشرفين الحالي هيتفور و نشوف مين اللي هيقعد
و مين اللي هيتخلي عن منصبه
و ييجي مكانه حد جديد

المشكلة الرابعة في حتة الادارة و الشلل اللي مصابة بيه
فده هيتعالج عن طريق
1- رحبوا معايا بالرجل
اللي هو مش ظاهر و لكنه اداري و لو مكنتش متأكد من اننا هنحتاجه مكنتش حطيته في المنصب ده
و ده اللي هيساعدني في تغيير روح المنتدي

الاداري
Igor
و اللي ان شاء الله هيعدل من وضع المنتدي في الفترة الجاية و في وقت قصير باذن الله تعالي
و احنا في انتظاره جميعا

2-مشمش المديرة المثالية هتتكرم و ده تقديرا لجهودها كاحسن مديرة علي مدار العام الماضي

3-هنفتح باب الاقتراحات بمناسبة بلوغ المنتدي عيد ميلاده الاول
و نشوف علي مدار العام الماضي ايه الحلو و ايه الوحش فينا
و ازاي نحسن من نفسنا
و من اسلوبنا في ادارة المنتدي

4-احتفالا بالمنتدي هنعمل استفتاء
هل يتغير الاستايل
و لا البانر نعمل فيه حركات عشان عيد ميلاد المنتدي و كده
و لا نفضل علي حالنا
و كمان هنقدم تكريم لافضل معيد و افضل دكتور من كل قسم مش بس لافضل دكتور علي مستوي الكلية
و ده شكرا و عرفانا بالجميل
و هنكرم احسن مشرف و مشرفه علي مستوي العام الماضي
و كمان عشان ده موسم حلو و الناس كلها لازم تتبسط و محدش يبقي زعلان مننا
و عشان في عيد ميلادي اللي هيتزامن مع عيد ميلاد المنتدي
اكيد الدنيا بتنور و العصافير بتزقزق و الحاجات اللذيذة دي
لازم الناس الزعلانة متزعلش
و اللي خاصمناه ميتخاصمش
و اللي شايل مننا حاجة ميشيلش
و مش شرط يعود تاني للمنتدي
و لكن عشان محدش يبقي عايش في الدنيا زعلان مننا احنا معشر المهيسين مش بنزعل مع حد
هنبعت وفد من المنتدي
لا وفد ايه
هنروح مع بعتينا نعتذر لاي حد زعل مننا و نصالحه
و نديله شيكولاته

5-و فيه حاجة كده بفكر اعملها
و ده بناء علي اقتراح كيمو
و هو اننا نعمل فوازير
و اللي يجاوب يتحطله نقط فيملفه الشخصي
و كل شهر يتعين ملك للفوازير
بس ده هنتقل عليه شويه اما نرجع لسابق عهدنا
و كمان هنعمل الاداري المنتخب
و ده منصب بيترشحله الاعضاء
و يخش انتخابات كل 2 شهر
و اللي يكسب بيدخل الادارة و بيبقي اداري زيه زي اي اداري تاني
ده علي اساس ان مفيش اداري منتخب يقعد اكتر من فترتين انتخابيتين ورا بعض
و ده بيضيف دم جديد للادارة
بس برضه اما الناس تتفاعل شوية

و في الاخر احب اشكركم و اتاسف لكم لو اطالت عليكم
و اشكر كل الناس اللي ساهمت في بناء المنتدي
من الادارة
مشمش

من الاداريين
ريسكي مان
سيمبا
ذا جيم

و عين المنتدي
يامي

من المشرفين
سمسمة
ليجيند
انسمك
كيمو

و لو نسيت حد اعذروني
انا بس بقول اخر اسامي كانت نشيطة في المنتدي و لسه شايفها

و متنسوش
الراي واجب في التوبيك ده
و التطوير مجمد لحد ما اسمع راي واحد واحد منكم

اولا: عايزة اعتذر وبشدة عن تقصيري الفظيع تجاه المنتدى
وانا فعلا مش مدياه حقه كما يجب..وده لظروف خاصة جدا
لكن المفروض اني افصل بين ده وبين الشغل
فبعتزر للمرة التانية ليك بالذات يا يوري

ثانيا: فعلا عندك حق في كل كلامك يا يوري
احنا بقينا كسلانين..وكتابة اي توبيك بقت مرتبطة بوجود ردود
يعني انا هتعب نفسي واكتب توبيك..كام واحد هيرد؟؟؟ مابلاش وجع دماغ
وده للأسف بيمنع الكثيرين من تقديم اي حاجة

ثالثا: انا شايفة ان كل اللي بيسجل جديد..بيسجل ويمشي.
يعني قليل اوي اللي بيسجل ويبدأ يظهر دوره ووجوده في المنتدى

رابعا: أحييك على الآتي
فصل مشرفين الأقسام الدراسية عن مشرفين الهياس او باقي المنتدى
الاهتمام بالحصريات
مبدأ الثواب والعقاب ( لو يجوز ليا اني اقول كده )
انك فكرت في خطوة الصلح الجميلة دي ( والمسامح يوري )
وانك اخترت الشيكولاته to break the ice

وبعد اذنك كنت عايزة اضيف حاجة
اننا نمشي في اجراءات الأسرة
ده هيساعد في الدعايا اكيد

والف مبروك يا ايجور
ربنا يوفقك بإذن الله
وبضم صوتي لصوت يوري وبشكر كل اللي ساهمو في بناء المنتدى
وبشكر كل حد حب المنتدى وكان قلبه عليه في يوم من الأيام
حتى لو مبقاش معانا دلوقتي

ربنا يوفقك يا يوري
وميرسي لذوقك انا ما استحقش كل ده

كل سنة وانتم طيبين

CEO & CHAIRMAN

العجيب ان الاسرة اتعملت من غير ما احس و ربنا سهلها من عنده امبارح بالليل جاللي تليفون من لجنة الاسر بيبلغوني بان فيه مسابقة ثقافية و عايزين فريقين عالاقل من الاسرة
الكلام ده كان حوالي 11:30 بالليل
وو طبعا مكانش فيه وقت غير اني ابلغ الناس و معظمهم اللي مردش او اللي طلع مرتبط بمواعيد و لا حرج عليه
و في الاخر دخلنا المسابقة و جبنا 8 من 30 بجدارة و ده لان الفرقة اللي شاركت مكانتش علي قدر كافي من الخبرة في المعلومات الثقافية
بس الموضوع هيتعاد يوم الاتنين تاني
و مطلوب فرقتين من الاسرة يسجلوا معانا
و هححط توبيك بكده
بس استنونا

والله انا سعيد جدا بالكلام ده و دي خطوه جميله جدا و روح حلوه جدا منك يا يوري و من تقدم لتقدم و يارب الكل يشارك و المنتدى يكبر و يستعيد نشاطه في اقرب وقت

مشرف الاسم : سمسمه الكلية : هندسة

كلامك مضبوط
ويارب يكون بفايده للمنتدى
واحب ابارك لايجور
وباذن الله كلنا منكنش مقصريين

حلو الكلا يا يوري بس ياريت يتنفذ و انا بعتذر علي كسلي في المنتدي و قلة المواضيع الجديده اللي بكتبها
و اوعدك في قسم كهربا هتشوف شغل تاني انا هاحاول اظبطه لاني مش لاقي حد في كهربا هنا اعرفه
فانا هاحاول احل معظم الشيتات وانزلها
يعني هاحاول اظبطه

شكرا يا عم يورى الموضوع كنا محتجينه من قرن فات
و كل سنة و انت طيب
وأنا بعترف أنى كنت من المشرفين المتربين
و إن شاء الله حنشيل التراب و ننضف تانى

و شكرا تانى لأنك حطيت عينى على نقاط مكنتش واخد بالى منها
و أحلى حاجة أن حيبقى فيه تقيم للمشرفين
ده حيصحصح المنتدى أكيد
وأنا معاك فى أى دعايا مسابقات حتى لو حنجمع تبرعات

و الحج ايجور أحنا معاك على طول

بخصوص المنتديات التعليمية
منتدى إنتاج مينفعش إذا مكنش مستحيل أنه يشتغل
لأن فى منتدى كل الدفعة شغالة بيه و بيتحط عليه كل حاجة
حتى لو محاضرة أتلغت المعيدين بيدخلوا يبلغونا
و كمان سعات فى دكاترة بترد
عموما عايزين نشوف حل للموضوع ده

ربنا يسهل بس ويتنفذ
وانا اكيد يعني حوزع واكيد لاعدادي يعني

كويس اوى ان احنا نعرف المشاكل والاسباب اللى ممكن تكون عطلت المنتدى عن التقدم زى ما كان فى الاول
واللى انا عايزه اقوله
ربنا معانا كلنا فى حوار المنتدى ويارب ننفذ اللى احنا عايزينه واللى نقدر عليه
بس لازم نرتب
الاولويات
فى الافكار الافكار كلها جميله
بس محتاجه ترتيب عشان تجيب النتيجه المطلوبه
وبيس على الجميع

جبت من الاخر والله يا عم يورى
دا هو ده الاساس اللى خلى المنتدى نايم على الاخر وانا قلت كدة لريسكى فى كلامنا مرة
وانا سعيد الحقيقة بالكلام ده واتمنى انه يبقى عيد ميلاد سعيد للمنتدى وليك
happy birthday

هوده الكلام ولا بلاش....... المنتدى بقى فعلا نايم خالص

وانا كنت واحد من الناس اللى مادخلتش بقالها كتير

بس ان شاء الله هنرجعه زى الاول واحسن..........

CEO & CHAIRMAN

ان شاء الله بداية من بكرة الصبح يتم فرز المشرفين
و تم الانتهاء من تصميم الفلايرات الجديدة بتاعة المنتدي

بدايه مبشره