استغربت جدا من خبر قريته فى احدى الصحف يؤكد ان احد الاجهزة الرقابية كشف عن ضياع مبالغ كبيرة فى احدى الشركات نتيجة فساد اطنان من المش !!
و اللى انا عارفه و متأكد منه بطبعى ان انا شخصية أكيلة ...و باكل كل حاجة ما عدا ((السبانخ و الكوسة و المانجة )) و طبعا بفهم فى اكل الجبنة القديمة و المش بمشتملاته من الدود و خلافه و كنت اعرف انه كل ما فضل المش اطول فترة ممكنة تزداد قيمته و كلما قدم المش كان افضل فى الاكل خاصة مع فحل بصل اخضر و طماطم و كابوتشى و بالهنا و الشفا
الواحد بعد الاكلة دى يقوم يهد حيطة و يبقى زى الاسد فى الغابة مش زى اسود حديقة الحيوان اللى عاملة زى البورص الجعان
الفار بقى لعب فى عبى و قعدت اقول ازاى المش فسد و بهذه الاطنان الكبيرة
و هل هذه مؤامرة جديدة على الغلابة باعتبار ان الاسعار دلوقتى مولعة نار و المش بقى اخر ملجأ للموظفين و الغلابة للاحتماء به ؟؟
بدل من اللحمة و الفراخ اللى بتعطس و الخضروات اللى بقت اسعارها فى العلالى
(((( تخيلو بجيب امبارح فاصوليا خضرا ...لقيت الكيلو بتسعة جنيه )))))
المهم احتار فكرى و دليلى عن اسباب فساد المش اللى بيسد رمق الغلابة ...... و الموضوع كبر فى دماغى و قلت لازمن و لابد ان اصل للحقيقة و عملت فيها المحقق كونان .......و تسللت للشركة المنتجة للمش و اخدت عينة من المش الفاسد و روحت بيها لمعامل صناعة الجبنة القديمة و المش و هى معامل قطاع خاص لا تتبع الحكومة و زيادة فى التأكد ذهبت لطنط ام عبير اللى بتبيع الجبنة القديمة و المش و الفطير اللى طعمه حلو ده عندنا فى المنطقة و الست دى بقى من اللى توارثوا الصنعة من اجدادها الفراعنة ....اول من اكتشفو المش الغنى بالبروتينات
و اتفجعت لما عرفت نتيجة تحليل العينة من الخبيرة ام عبير!!
و اكدتلى طنط ان المش فسد لان الدود غير مطابق للمواصفات القياسية
و هذا الدود الخاص بالمش هو احد مكونات المش الريفى و هو الذى يساعد على تحويل الجبنة القريش الى جبنة قديمة اذ يفرز مواد كيميائية تساعد على تحلل الجبنة ..... و ابشركة بقى لجأت لاستيراد هذا الدود من بعض الدول الاسيوية لانه رخيص الثمن بالمقارنة بالدود المصرى الاصيل .....و اتضح ان الدود المستورد ابو سعر حنين ما بيقومش بدوره الا ربع ساعة بس و باقى اليوم بيزوغ من شغله و ياكل اونطة !!!
و ان فروق اسعار شراء الدود دخلت جيوب بعض المتربحين....و ادى هذا الى انتحار الدود الاصلى نتيجة انتشار البطالة بين صفوفه مما يهدد بانقراض السلالات الاصيلة و ادى ايضا الى فساد اطنان المش مما شكل عبئا و خسائر كبيرة على الاقتصاد القومى
و تسربت نتائج التحليل ده الى سفارة الدول المصدرة للدود و هددت باتخاذ اجراءات اقتصادية شديدة لو تمت اى اجراءات لمنع استيراد دود المش من بلدها لانه المصدر الرئيسى للدخل عندهم !!!
و فجأة سمعت نبا انتحار دودنا اعتراضا على فساد المش و استيراد الدود من الخارج و شكرا....... كان معكم ميلانو من اما مصانع المش
المقال ده سياسى بحت للى بيفهمو فى السياسة only
الإثنين مارس 24, 2008 12:32 pm
