ايه رايكوا في جواز الصالونات؟

بصوا هو انا مش ممكن اسمح لنفسي اني احطها في موقف زي ده بس بشوف ناس متجوزه كده وناجحين جداااااااااااا
بس انا بحس انه بيعه وشروه
ومش مدي للبنت حقها
زي متكون البنت دي للفرجه والعرض
هما ليه الامهات بيفكروا كده
تفتكروا ليه
وعندك انتي او انت استعداد للجواز بالطريقه دي
وتفتكري انتي ان لو جه رجل بالطريقه دي بالضروره يكون رجل معقد؟

لا معتقدش انه فيه جواز صالونات ده انقرض خلاص
ده بالعكس دلوقتى فيه تفتح كبير عن زمان
وان كان عن نفسى انا مستحيل ابدا اتجوز اساسا

ايه يا بنى متعقد كدا ليه من الجواز
بس مهما تقول هتقع برده وهتتجوز وهتشوف

YURI كتب:

ايه يا مان
مش عايز تتجوز ليه
خايف من ايه
هتقلقني منك ليه يا وحش
ده انت حفيد الفراعنة
يعني فطاحل العالم
يعني ملوك افريقيا
مش عايز تتجوز ليه بقي
هتشككني فيك ليه
انت مش حيلتك برضه الصحة و الستر
ده الجواز حلو و لذيذ كده
و حتي لازم تتجوز عشان تصون نفسك

لا لا لا
انت كده دخلت فى منطقه اعراض يا ممممان
لا بس عشان انا مبحبش الالتزام وبعشق الحريه وكمان مش لاقى الواحده اللى تستاهل انى اخسر حريتى مش اكتر
ومتشكش ولا حتى تفكر انك تشك فى قدراتى
ده انا جامد اوى

menooo كتب:

ايه يا بنى متعقد كدا ليه من الجواز
بس مهما تقول هتقع برده وهتتجوز وهتشوف

هقع ايه هو انا بلعب ماتش كوره سباعى عشان اقع
ومتقلقيش انا مفتح ومحدش يعرف يوقعنى
ربنا يستر

لا كل الناس بتقول كده ولاد او بنات
بس بيتجوزوا فى الاخر ده واقع او سنه الحياه
وهتقع
اصل الناس اللى بتقول كده بتقع واقعه جامده اوووووووووووووووووووووى يعنى

menooo كتب:

لا كل الناس بتقول كده ولاد او بنات
بس بيتجوزوا فى الاخر ده واقع او سنه الحياه
وهتقع
اصل الناس اللى بتقول كده بتقع واقعه جامده اوووووووووووووووووووووى يعنى

ربنا يستر

طبعا طبعا يا مشمش انتي فاهماني

وحياتك ريح دماغى من الحب الأسود
بتاعك ده اللىمالوش اخر غير ان فى
ناس بتقع وخلينا فى موضوعنا
عموما هو أغلب أهالينا اتجوزوا كده
بس الكلام ده قدم قوى
دلوقتى مفيش حد عارف يتجوز أساسا

هههههههههههههههههه
ميرسي علي ردودكوا يا جماعه

YURI كتب:

بس واضح انك بتحب الحرية يا جيم
طب و هتصون نفسك ازاي من الوقوع في الخطيئة
ده الجواز لازم
قلت زيك كده
و استهنت بالحب و قلت انه مش موجود
في نفس اليوم
يشاء الله وقوعي في الحب
بعديها ب ساعة واحدة بس

يا عم هصلى وان شاء الله مش هقع فى الخطيئه
وحته الحب مش لازم اللى احبها هتجوزها ممكن تحصل حاجات تمنع كده

مين قال ان جواز الصالونات انقرض بالعكس دة لسة موجود وفي ناس اعرفها كتير بتتجوز كدة وبالعكس بتبقي ناس محترمة وليها شخصية كمان وبالرغم انى محبش اتجوز كدة بس انا شايفاه انة كويس وناجح في احيان كتير

ميرسي علي الرد ياجماعه

عارفة يا دودا في نوع من انواع الجوازات اغرب من جواز الصالونات

وهو ان واحده تشوف بنت في الشارع وتعجبها تروح خطباها لاخوها او ابنها


والواد لا شاف البنت ولا عرفها غير يوم الخطوبه او قراية الفاتحه

ده بقى اللي تخلف رسمي

انما جواز الصالونات في حاجه واحده ممكن تحسب ليه انه غالبا بيحصل بين عائلات بمعنى ان عيلة الولد عارفة عيلة البنت فيبخطبوها له اذا عجبته طبعا
مش معنى كده اني ممكن اوافق على جوازة من النوع ده
كلا البته


اجمل جواز في رأيي هو اللي قايم على الحب بين اتنين يعرفوا بعض كويس وفاهمين بعض
والاهم انهم يكونوا متقبلين بعض

ميرسي علي الرد يا جماعه واهلا بيكي يا سومه

انا مش بكره فى حياتى زى جواز الزفت الصالونات بجد انا بكره قووووووووووووى قوووووووووى
مع ان كل اخواتى البنات متجوزين بالطريقه دى وناجحين فى جوازهم بس انا عمرى ما هقبل انى اكون فرجة
يعنى واحد يجى يتفرج عليا ويقول رايه ويمشى ويمكن معجبش سيادته وهو اصلا زبالة لانه فكر بالطريقه دى
بس الولاد بيحيروا البنات فى الحته دى ما اهو انا بارده اخاف اتعرف على ولد واحبه وبعدها يقولى اصل انتى سمحتى لنفسك انك تمشى معايا طيب ما انا كنت حتنيل احبك ازاى من غير ما نتكلم حتى مع بعض وخاصه لو كان معايا فى الكلية والله بجد حاجة تحير الاحسن ان احنا منتجوزش اصلا ولا نفكر فى الجواز

اولا اكيد جواز الصالونات ده منقرضش
والكل تقريبا بيقول في الاول كده مش حتجوز جواز صالونات وفي الاخر بيتجوز جواز صالونات

لان تقريبا معظم اللي تلاقيهم بيحبوا بعض وخصوصا في الدراسه بيكون نهايتها فاشله والاتنين يسيبوا بعض والموضوع يتفشكل وبالتالي مفيش ملجا غير جواز الصالونات
وبعدين لي فكره هو مش سيء اوي للدرجادي

وهو مش جي يتفرج
القصد من الموضوع ده ان كل واحد يشوف التاني
ويشوف حيبقي في تفاهم حيبقي في موده
شخصيه كويسه حتتقي الله فيا
وفي الحاله دي البنت هي اللي بتقرر اه او لاء

بس للاسف الموضوع بيتفهم غلط انه جاي يتفرج عليها وهي تتفرج عليه وده في حد ذذاته مفهوم خاطيء جدا
بدليل ان معظم الجوازات دي ناجحه عن الجوازات اللي عن حب

اولا يا يوري رجل المستحيل مش مان خااااااااااالص
دي بنوته زي العسل

ثانيا بقى الجواز ده بيبقى ناجح ظاهريا بس
بمعنى انه بيبقى في حالة استقرار

انما لو عشت مع اتنين متجوزين جواز صالونات تلاقيهم مش بيتخانقوا ومتفاهمين خالص عشان مش بيتكلموا مع بعض اصلا ولا في بينهم اي تعامل

الراجل يجي البيت عشان ياكل وينام وبس
والست بقى كل همومها البيت والطبخ والعيال
وتلاقي الراجل اول ما يدخل البيت يجري يجيب الجرنال عشان يقراه او يمسك الريموت عشان يتفرج على التليفزيون
عشان يهرب طبعا من مراته اللي كلامها دايما بيكون شيق جدا ويخلي اي حد يبقى مشتاق انه يسمعه
موضوعات هامه جدا
الواد النهارده جاب درجة مهببة في الحساب
وانت مش بتكلمني ليه

تفتكر ده نجاح؟؟؟؟؟؟