جرب تركب ميكروباص من اى حتة فى اسكندرية و هو متجه لمحطة مصر تلاقى راجل فى الخمسينات بيسخر من الركاب و من السائق من كل من حوله تبصله اول بصة تحس انه جاى من اعماق الصعيد....يبدأ كلامه مع السادة الركاب ( عايز ارجع بلدى و مش عاوز بس غير10 جنيه اجرة العودة فقط ) و الناس طيبين و عايزينه يروح بلده يقول ان الاسكندرانية اهل كرم و شهامة و تلاقى عم الحج ينزل من الميكروباص و معاه اجرة العودة فريست كلاس و كمان معاه يجيب حاجة حلوة للولاد...عشرة فى عشرة بعد ما يتنطط فى كام ميكروباص يطلعلو بميت جنيه فى اليوم و 3 الاف جنيه فى الشهر او اكتر .......يا عينى عليكى يا طيبة.......بلاش ده خد عندك ....الواحد بعد ما يركن العربية عند الباب اللى فى شارع احمد لطفى السيد عارفينه طبعا بعد ما يقفل العربية و يشيل الكتب و حرف التى و اللذى منه يلاقيلك ست طيبة تقولك عايزة تروح بلدها و الواحد قلبه بيحن و يطلع لها حاجة يمكن تدعيله دعوة حلوة و هو داخل جهنم قصدى ( الكلية ) و شوف فى كام قلب طيب فى كليتنا و فى كام ندى حتتطلع بيهم الولية دى ..........يا عينى عليكى يا طيبة.....ده حتى يوم الفيزيا كنت ماشى مع واحد صحبى واحدة بنشوفها كل يوم ادام باب انتاج طلبت منه حسنة مرضاش يديها فيبدو انها دعيت عليه فطلع من الامتحان بيعيط ( مش عارف ليه ) اكيد الست دى سرها باتع.....
المهم ان الشحاتين اللى عندنا ادام الكلية و اللى فى كل حتة بيطلعولهم فى الشهر بكذا الف جنيه و من هذا المنطق يفسر الشحات حرفته , و هو المنطق نفسه الذى ردت بيه بنوته صغنونة فى عمر الزهور كانت تتسول عند الاشارة عند ملتقى الطرق و سألتها السيدة المحترمة لماذا لا تعملين يا شاطرة خادمة؟ تأكلين و تشربين و تلبسى ثياب نظيفة و فوق هذا اعطيك اجرا شهريا ......سألتها البنت حتدينى كام قالت السيدة 400 جنيه ، ضحكت البنت وقالتلها ده انا بكسبهم فى اليوم الواحد
و فى كل مرة يعمل الشحاتين على تطوير مهنتهم لمضاعفة دخلهم و ارباحهم...و هكذا اصبحت صورة الشحات ى ثياب قديمة و رثه متجاوزة و قديمة .....فهناك شحاتين يرتدون احسن الثيابو يقدمون نفسهم لك فى صفات عديدة فمثلا و انت تسير ساهيا فى الشارع على الرصيف سرحان فى الامتحانات و اللى بيحصل فينا فى الكلية .....تلاقى فتاتان فى عمر الزهور ( موزز من الآخر ) يقدمان لك نفسهما على انهما طالبتان فى كلية الآداب و تلتمسان منك بلغة مهذبة ممزوجة بالفرنسية مساعدتهما على توفير تمن التذكرة للرجوع الى مدينتهم.....و ادفع يا عم الشهم
لكن الذين يعتمدون مثل هذه الاساليب ( متقمصى ادوار المحترمين ) يحاولون خداع الناس بأنهم ليسو شحاتين محترفين و هم بالتالى يدركون بأن من اكثر من شخص سوف ينطلى عليه " سحرهم " فلا يشعر الا وهو يضع يده فى جيبه و يخرج ورقة من فئة ال10 جنيهات على اقل تقدير
و لهذا اقترح على قادة الشحاتين ان يتقدمو للجنة شئون الاحزاب بطلب تأسيس حزب لهم فى مصر مبررين للمسئولين انهم لا يطلبون شيئا من الحكومة و لا يريدون معاشات بعد تقاعدهم عن العمل لأنهم سيكسبون اكتر حيث سيعمل بعضهم فى اعطاء دروس فى الشحاتة و فى تقديم استشارات فى تطوير مهنة الشحاتة...و بهذا ممكن ان يحلو مشكلة البطالة فى البلد دون ان تصدر لهم صحيفة او حتى دخول نسبة منهم فى مجلس الشعب...
و بالمرة اقترح على وزارة التعليم العالى انشاء كلية الشحاتة و لتكن من كليات القمة لتضاهى كلية الطب و الهلوسة و الصيدلة.......و دمتم سالمين........
ميلانو
الجمعة مارس 07, 2008 3:08 am
